=口= 小蕊の祕密基地

今日諗住對自己好D…
同阿妹商量好，Tum咗媽咪去咗綠茵閣食Lunch!!!
我同阿妹都鬼死咁開心…
因為我同妹都好鍾意食綠茵閣嘅牛肋排!!!

我哋來到起義路嗰間綠茵閣…
因為係Lunch Time…所以都OK多人!!!
我哋揀咗無煙區，坐咗落嚟。
跟住，個Waitress就走過嚟，同我哋點餐…
一切都好正常…

我哋點咗個古典式牛仔肋排(兩人份)，
同埋一個澳洲美食節嘅B套餐。
套餐入麵有個鮮蝦沙律，湯，鰻魚炒飯…

五分鍾後，個湯就上場喇…
我哋飲咗幾啖，個Waitress就走過嚟，
同我哋講：“唔好意思啊…個古典式牛仔肋排賣曬喇!或者妳哋睇下換D乜嘢啊?”
“吓?冇曬喇?!咁我哋再睇下喇…”我同妹都好失望!!!
最想食嘅嗰樣嘢竟然冇得食喔!!!
之後，經過商量，我哋決定點個煙豬肋排(兩人份)。
雖然豬肋排冇牛肋排咁好食…不過最後我哋都揀咗佢…
捨而求其次…冇計喇!!!
五分鍾後，到沙律上場喇…
跟住個Waitress又走過嚟，
又同我哋講：“唔好意思啊…個煙豬肋排都冇曬喇!!”
“靠!!!有冇搞錯??!!又冇!!!”我開始嬲…
跟住，我同妹又睇個餐牌…最後，決定要西式燒烤牛仔腿。
“嗱嗱嗱…一間唔好又行過嚟話冇啊!!!”我講
再嚟…五分鍾又過去喇…個飯都上嚟喇…
伴隨住個飯，嗰個Waitress又走過嚟，
“真係好對唔住啊…個西式燒烤牛仔腿都冇啊!!”
“有冇搞錯啊!!!點三樣嘢，三樣都冇??!!”媽咪終於忍唔住，發火…
“米係囖!!!不如妳索性話我知，第4頁呢度10樣嘢…妳哋究竟有邊樣喇!!!”我講
“唔使喇…再嚟又冇…再嚟又冇…唔使食喇!!”妹講
所以…我哋冇再點其他嘢…
食完就走人!!!

咁大間連鎖西餐廳…居然點乜冇乜??!!大佬…咁你學咩人做生意喈??!!
定係你哋間綠茵閣聽日就執粒，所以今日乜嘢都冇???!!!
我哋又唔係冇錢俾…係度食餐飯喈…都食到鬼死唔開心…真係嬲!!!

綠茵閣!!!你好嘢!!!下次…請我都要考慮下啊!!!哼!!! >______<